Job 4

Impendulo Ka-Elifazi

1 Wasephendula u-Elifazi umThemani wathi:

2 “Nxa umuntu angaphosa ilizwi nje kuwe uzacunuka na? Kodwa ngubani ongathula angakhulumi na?

3 Khumbula ukuthi sewabafundisa njani abanengi, ukuthi ubaqinise njani abalezandla ezibuthakathaka.

4 Amazwi akho abasekele labo abakhubekayo; uwaqinisile amadolo axegayo.

5 Kodwa manje sekuthe ngokuthi uhlupho luze kuwe usuphela amandla; lukutshaya ubusudela ithemba.

6 Kungani ukukholwa kwakho kungabi yiso isibindi sakho na lezindlela zakho ezimsulwa zibe lithemba lakho na?

7 “Khumbula manje: Ngubani owathi engelacala wabhubha na? Kungaphi lapho abaqotho abake babhujiswa khona na?

8 Ngokubona kwami labo abalima okubi lalabo abahlanyela udubo bavuna lona.

9 Ngokuphefumula kukaNkulunkulu bayabhubha; ngokukhwaza kolaka lwakhe bayafa.

10 Izilwane zingabhonga zihwabhe, kodwa amazinyo ezilwane ezinkulu ayephuka.

11 Isilwane siyafa ngokuswela ukudla bese-ke imidlwane yesilwanekazi isabalale.

12 “Kulethwe ilizwi kimi ngasese, izindlebe zami zilizwile linyenyezwa.

13 Phakathi kwamaphupho adungayo ebusuku, lapho abantu belele befile,

14 ukwesaba lokuthuthumela kwangifikela kwenza wonke amathambo ami aqhaqhazela.

15 Kwathi tshazi emehlweni ami ithongo elithile, wahlasimula umzimba wami izinwele zasiphuka zema.

16 Ithongo lelo lema, kodwa kangikwazanga ukuthi kuyini. Kwakumi into phambi kwamehlo ami, ngasengisizwa ilizwi elihelezayo:

17 ‘Kambe umuntu angalunga okudlula uNkulunkulu na? Umuntu angahlanzeka kuloMenzi wakhe na?

18 Nxa uNkulunkulu engazithembi izinceku zakhe, nxa ebeka izingilosi zakhe umlandu ngokona,

19 pho-ke kuzakuba njani kulabo abahlala ezindlini zodaka, ozisekelo zazo zisothulini, abahlifizeka lula njengenondo!

20 Phakathi kokusa lokuhlwa bayabhidlizwa babe yizicucu; bengananzwa langubani, bayabhubha kokuphela.

21 Izintambo zamatende abo kazidonswa na, bafe bengelalwazi?’